මාලදිවයිනේ මාලේ නුවරදී නිමා වූ 7 වැනි කැරම් ලෝක කුසලාන තරගාවලියේදී පදක්කම් 2ක් දිනා ගැනීමට ශ්රී ලංකා කණ්ඩායම සමත් විය.
එහිදී නායක ෂහීඩ් හිල්මි ප්රමුඛ ක්රීඩකයෝ කණ්ඩායම් ඉසව්වේ රිදී පදක්කම රැක ගැනීමට සමත් වූ අතර, කණ්ඩායම් ඉසව්වේ අවසන් තරගයේදී ලෝක ශූර ඉන්දීය පිල රන් පදක්කම දිනා ගැනීමට සමත් විය.
අවසන් වරට 2024 වසරේ පැවති ලෝක කුසලානයේදීත් ශ්රී ලංකා පිරිමි කණ්ඩායම රිදී පදක්කම දිනා තිබිණි. මෙවර තරගාවලියේ ලෝකඩ පදක්කම බංග්ලාදේශයට හිමි විය.
ජෝසප් රොෂාටා නායකත්වය දුන් කාන්තා පිල කණ්ඩායම් ඉසව්වේදී අමෙරිකානු කණ්ඩායම පරාජය කරමින් ලෝකඩ පදක්කම දිනාගත් අතර, ඒ සමඟ පසුගිය වර තරගාවලියේදී ඔවුන් දිනා තිබූ රිදී පදක්කම මෙවර අහිමි වී ගියේය. එහි රිදී පදක්කම මාලදිවයින දිනාගත් අතර, රන් පදක්කම ඉන්දියාවට හිමි විය.
මේ ඉසව්වේ අවසන් පූර්ව තරගයේ කේවල තරගයකදී ශ්රී ලංකා ක්රීඩිකා ටස්මිලා කාවින්දි ඉන්දීය ජාතික ශූරිය වන එල්. කීර්තනා පරාජය කිරීමට සමත් වීම කැපී පෙනිණි. මෙහි විශේෂත්වය වූයේ ශ්රී ලංකා ක්රීඩිකාවක් කැරම් කේවල තරගයකදී ඉන්දීය ක්රීඩිකාවක් පරාජය කළේ වසර 9කට පසුව වීමය. තරුෂි හිමහන්සිකා ලෝක ශූරි කසිමාට එරෙහිව විශිෂ්ට තරගයක් ලබාදීම කැපී පෙනිණි.
පිරිමි සහ කාන්තා කේවල ඉසව්වේ රන්, රිදී සහ ලෝකඩ පදක්කම් සියල්ල ඉන්දීය ක්රීඩක ක්රීඩිකාවෝ දිනා ගැනීම කැපී පෙනිණි. කාන්තා කේවල ඉසව්වේ අවසන් පූර්ව වටයට සුදුසුකම් ලබා ගැනීමට දී ටස්මිලා කාවින්දි සමත් වූ අතර, එම තරගයේදී ඇය ඉන්දීය ක්රීඩිකා කීර්තනා හමුවේ පරාජය වීමෙන් අවසන් තරග වරම් අහිමි වී ගියාය. අනතුරුව ඉන්දීය ක්රීඩිකා කාසිමා මාෂා සමඟ තෙවැනි ස්ථානයට තරග වැදුණු ටස්මිලාට සිවුවැනි ස්ථානයෙන් නතර වීමට සිදු වූවාය. නිපුණි දිල්රුක්ෂි 9 වැනි ස්ථානයට පත් වූ අතර, පිරිමි කේවල ඉසව්වේදී ෂහීඩ් හිල්මි 5 වැනි ස්ථානයට පත්විය. ශ්රී ලංකා කණ්ඩායම කටුනායක ගුවන්තොටුපොළෙන් ඊයේ යළි මෙරටට පැමිණියේය.
මේ තරගාවලියට රටවල් 17කින් තරගකරුවෝ 150කට අධික සංඛ්යාවක් එක්ව සිටියහ.
