ඉන්දීය ප්රිමියර් ලීග් ක්රිකට් තරගාවලියේ මීලග 19 වැනි තරගවාරය සඳහා ක්රීඩකයන් 350ක් වෙන්දේසියට සූදානම් කර ඇති අතර, මෙයට කලින් ලැයිස්තුගත නොකළ ක්රීඩකයන් 35 දෙනෙකු අතරට කුසල් පෙරේරා, දුනිත් වෙල්ලාලගේ, බිනුර ප්රනාන්දු සහ ට්රෙවින් මැතිව්ස් ඇතුළත් කොට ඇත.
අලුතින් අයිපීඑල් වෙන්දේසියට එක්වූ කුසල් පෙරේරා ඉන්දීය රුපියල් කෝටි එකකට (ශ්රී ලංකා රුපියල් කෝටි 3.44ක්), දුනිත් වෙල්ලාලගේ හා බිනුර ප්රනාන්දු ඉන්දීය රුපියල් ලක්ෂ 75 බැගින් (ශ්රී ලංකා රුපියල් කෝටි 2.58 බැගින්), ට්රෙවින් මැතිව්ස් ඉන්දීය රුපියල් ලක්ෂ 30කට (ශ්රී ලංකා රුපියල් කෝටි 1.4ක්) වෙන්දේසියේ තබා ඇත.
මෙවර ඉන්දීය ප්රිමියර් ලීග් තරගාවලියේ වැඩිම මුදලකට ලංසු තබා ඇති ශ්රී ලංකා ක්රීඩකයන් වන්නේ වනිඳු හසරංග, මතීෂ පතිරණ හා මහීෂ් තීක්ෂණ වන අතර, ඔවුන් තිදෙනාගේ ආරම්භක වෙන්දේසි මුදල ඉන්දීය රුපියල් කෝටි 2ක බැගින් (ශ්රී ලංකා රුපියල් කෝටි 7 බැගින්) වේ.
මෙයට අමතරව චරිත් අසලංක ඉන්දීය රුපියල් කෝටි එකකට (ශ්රී ලංකා රුපියල් කෝටි 3.44ක්) හා දසුන් ශානක, පැතුම් නිශ්ශංක, කුසල් මෙන්ඩිස්, විජේකාන්ත් වියස්කාන්ත් ඉන්දීය රුපියල් ලක්ෂ 75 බැගින් (ශ්රී ලංකා රුපියල් කෝටි 2.58 බැගින්) ආරම්භක වෙන්දේසි මුදලට තබා ඇත. මෙවර ඉන්දීය ප්රිමියර් ලීග් ක්රිකට් තරගාවලියේ වෙන්දේසිය මේ මස 16දා අබුඩාබිහිදී පැවැත්වීමට නියමිත අතර, ලියාපදිංචි වූ ක්රීඩකයන් 1355කගෙන් ක්රීඩකයන් 1005ක් ම ඉවත් කර තිබේ.
අලුතින් එකතු කරන ලද ක්රීඩකයන් 35 අතර වැඩිම අවදානයක් දිනාගත් ක්රීඩකයා වන්නේ දකුණු අප්රිකානු කඩුලු රකින පිතිකරු ක්වින්ටන් ඩි කොක් වන අතර, ඔහු පසුගිය වසරේ කොල්කටා නයිට් රයිඩර්ස් සමඟ ඉන්දීය රුපියල් කෝටි 2කට (ශ්රී ලංකා රුපියල් කෝටි 7කට) එක්වූවේය. එහෙත් ඔහු ක්රිකට් පිටියෙන් විශ්රාම ගිය බව පැවසුවද අයිපීඑල් තරග බිමට පිවිසීම පිළිබඳ කතාබහක් ඇතිව තිබේ.
මෙවර ඉන්දියානු ක්රීඩකයන් 240ක් සහ විදේශීය ක්රීඩකයන් 110ක් ඇතුළත් වන අතර, ශ්රී ලංකාවෙන් ක්රීඩකයන් 12ක් ඉදිරිපත් වෙද්දී, එංගලන්තය (21), ඔස්ට්රේලියාව (19), නවසීලන්තය (16), දකුණු අප්රිකාව (15), ඇෆ්ගනිස්තානය (10), බටහිර ඉන්දීය කොදෙව් (9), බංග්ලාදේශය (7) හා අයර්ලන්තය (1) වෙන්දේසිය නියෝජනය කරති.
